Haradinaj kujton dorëheqjen nga posti i kryeministrit dhe arsyen për vendimin: Qëndrimi im mbetet i njëjtë edhe sot

Ish- Kryeministri i Kosovës, Ramush Haradinaj, ka kujtuar shtatëvjetorin e dorëheqjes së tij nga posti i kryeministrit, duke theksuar se arsyet që e shtynë të marrë atë vendim mbeten të pandryshuara.

Përmes një postimi, Haradinaj rikujtoi se kishte dhënë dorëheqje për herë të dytë nga drejtimi i Qeverisë së Kosovës për t’u paraqitur në Dhomat e Specializuara në Hagë si qytetar dhe jo si kryeministër.

Ai po ashtu përsëriti qëndrimin e tij se Kosovës po i bëhej presion i padrejtë lidhur me çmimin e njohjes nga Serbia, ndërsa theksoi se ndarja e vendit dhe krijimi i një “Dodik Republike” në Kosovë kanë qenë dhe mbeten të papranueshme.

“Qëndrimi im atëherë ishte i qartë dhe i palëkundur. Ai mbetet i njëjtë edhe sot”, ka shkruar Haradinaj.