Arrestohen disa zyrtarë në Ministrinë që drejtohet nga Sveçla, dyshohet se kryen shërbime për përfitime financiare

Disa zyrtarë të Ministrisë së Punëve të Brendshme, që drejtohet nga Xhelal Sveçla, janë arrestuar të mërkurën pasi që dyshohen se me qëllim të përfitimit financiar, kanë kryer shërbime ndaj palëve duke anashkaluar procedurat ligjore.

Lajmi është bërë i ditur edhe nga vetë Ministri Sveçla, i cili ka njoftuar se zyrtarët e arrestuar të MPB-së janë dy të Divizionit për të Huaj, një i Agjencisë së Regjistrimit Civil dhe një shtetas i huaj.

“Mirëpres aksionin e përbashkët të Policisë së Kosovës dhe Agjencisë së Kosovës për Inteligjencë, i cili rezultoi me arrestimin e dy zyrtareve të Divizionit për të Huaj, një të Agjencisë së Regjistrimit Civil dhe një shtetasi të huaj, për të cilët ekziston dyshimi se në kuadër të ushtrimit të funksioneve të tyre zyrtare e ndërmjetësuese dhe me qëllim të përfitimit financiar, kanë kryer shërbime ndaj palëve duke anashkaluar procedurat ligjore”, ka shkruar Sveçla në Facebook.

Kreu i MPB-së theksoi se “mbetemi të përkushtuar ndaj parimeve të integritetit, ligjshmërisë dhe llogaridhënies së çdo zyrtari publik”.

“Çdo dyshim për keqpërdorim të detyrës zyrtare, korrupsion apo cenim të besimit të qytetarëve do të trajtohet me seriozitet të plotë dhe në bashkëpunim të ngushtë me institucionet përgjegjëse të sigurisë dhe drejtësisë”.

Sveçla theksoi se luftimi i korrupsionit dhe garantimi i integritetit institucional “janë parakushte thelbësore për ofrimin e shërbimeve të drejta, efikase dhe transparente për qytetarët”.

“Askush nuk do të lejohet të përdorë pozitën zyrtare për përfitime personale në dëm të interesit publik dhe të drejtave të qytetarëve për trajtim të barabartë para institucioneve”.