Haxhiu deklarohet para seancës, akuzon opozitën se po bën përpjekje që ta çojë vendin në zgjedhje

Ushtruesja e detyrës së presidentes, Albulena Haxhiu ka folur para Kuvendit të Kosovës në lidhje me shkeljen e Kushtetutës, pasi seanca u thirr pas afatit.

Ajo para seancës së sotme të thirrur nga Lëvizja Vetëvendosje ka thënë se vitin e kaluar deri në konstitum kanë kaluar 160 ditë.

“Në vitin e kaluar, prej momentit kur Gjykata Kushtetuese ka marrë vendim që brenda 30 ditëve duhet të konstituohet Kuvendi i Republikës së Kosovës, e deri në konstituim kanë kaluar diku 160 ditë — pra jo 30, po 160 ditë. Po t’u heqim këtu ditët kur çështjet kanë qenë duke u trajtuar në Gjykatën Kushtetuese, janë gjithsej diku 59 ditë. Pra, nuk është konstituar as vitin e kaluar seanca brenda 30-ditëshit”, ka deklaruar Haxhiu.

Haxhiu ka akuzuar partitë opozitare se po bëjnë përpjekje që ta dërgojnë vendin sërish në zgjedhje të parakohshme.

“Në rrethanat aktuale, ju e dini që në momentin që të konstituohet Kuvendi, vlen afati pastaj për zgjedhjen e presidentit prej 60 ditëve. Duket që ka një përpjekje, që unë s’po e kuptoj, që vendi të shkojë sërish në zgjedhje të parakohshme, por e kanë gabim. Kushdo që përpiqet që përmes veprimeve të tilla ta çojë vendin në zgjedhje, mendoj që ka shumë gabim, sepse qytetarët e Republikës së Kosovës na kanë votuar për të kontribuuar për marrëveshje, e jo që të veprojmë në mënyrë të tillë dhe të përpiqemi që ta çojmë vendin në zgjedhje. Nuk na duhen zgjedhjet”, është shprehur Haxhiu.

Tutje, ajo ka thënë se “kushdo që ka problem me seancën e sotme, mund t’i drejtohet Gjykatës Kushtetuese”.

“Kushdo që ka probleme me seancën e sotme, unë e ftoj që t’i drejtohet Gjykatës Kushtetuese. Ju e dini që vitin e kaluar e kanë bërë në vazhdimësi. Prandaj edhe sot, në qoftë se nuk pajtohen me thirrjen e kësaj seance, e kanë mundësinë që ta dërgojnë çështjen në Gjykatën Kushtetuese. Gjykata Kushtetuese e ka konsideruar këtë seancë si çështje kushtetuese për shkak se bëhet fjalë për konstituimin e Kuvendit”, tha ajo.

Theksojmë se mbrëmë deputetët opozitarë qëndruan deri rreth orës 00:00 në ambientet e Kuvendit të Kosovës, derisa dyert e sallës ku mbahen seancat ishin të mbyllura.

Ata kërkuan që seanca konstituive të vazhdonte mbrëmë, megjithatë, një kërkesë e tillë nuk u dëgjua nga Lëvizja Vetëvendosje.

Eugen Cakolli nga Instituti Demokratik i Kosovës ka thënë se caktimi i seancës konstituive për të shtunën, më 8 korrik, është shkelje e drejtpërdrejt e Kushtetutës.

Ai në një shkrim në rrjetin social Facebook, ka thënë se Dehari e ka pasur obligim thirrjen e seancës për sot.

“Caktimi i vazhdimit të seancës konstituive për nesër, në orën 11:00, përbën shkelje të hapur dhe cenim të drejtpërdrejtë të rendit kushtetues.

Kryesuesi Avni Dehari ka pasur obligim ta thërriste vazhdimin sot, në një kohë që do të mundësonte edhe përfundimin e seancës deri në orën 23:59. Afati 48-orësh për pauzën është kufi procedural dhe zbatohet vetëm brenda afatit kushtetues.

Dehari, përmes caktimit të vazhdimit pas afatit, dhe LVV-ja, përmes mosushtrimit brenda afatit 30-ditor të së drejtës ekskluzive të propozimit, ua kanë pamundësuar deputetëve ushtrimin e të drejtave dhe detyrimeve të tyre kushtetuese”, ka shkruar ai.

Cakolli ka shtuar se ky vendim dhe krejt kjo sjellje, është shkelje procedurale, shkelje kushtetuese dhe moszbatim i aktgjykimit të Gjykatës Kushtetuese.

Po ashtu, ai ka shtuar se së paku 10 deputetë, duhet t’i drejtohen Gjykatës Kushtetuese pas mesnatës që të kontestohet ky vendim.

“Ky vendim dhe e gjithë kjo sjellje përbëjnë shkelje procedurale, shkelje kushtetuese dhe moszbatim të aktgjykimit të Gjykatës Kushtetuese. Prandaj, menjëherë pas mesnatës, së paku dhjetë deputetë duhet t’i drejtohen Gjykatës Kushtetuese, ta kontestojnë vendimin për caktimin e seancës pas afatit dhe mosveprimet e 6 dhe 7 gushtit, si dhe të kërkojnë masë të përkohshme për pezullimin e seancës së nesërme para orës 11:00”, ka thënë ai.