Dy persona lëndohen pas rrëzimit të vinçit në një punishte në Prishtinë

Një vinç është rrëzuar të martën në një punishte ndërtimi në zonën e Lagjes së Spitalit në Prishtinë.

Si pasojë e incidentit, dy persona kanë pësuar lëndime dhe kanë pranuar tretman mjekësor.

Rastin për Gazetën Online Reporteri.net e ka konfirmuar zëdhënësi i Policisë së Kosovës për rajonin e Prishtinës, Enis Pllana.

“Lidhur me rastin në fjalë, ju njoftojmë se dy persona kanë mbetur të lënduar, të cilët kanë pranuar tretman mjekësor. Njësitet policore kanë dalë në vendin e ngjarjes dhe kanë ndërmarrë veprimet e nevojshme”, ka deklaruar Pllana.

Ai ka bërë të ditur se njësitet relevante, në koordinim me Prokurorin e Shtetit, kanë nisur hetimet për zbardhjen e rrethanave të rastit.

“Aktualisht njësitet relevante në koordinim me Prokurorin e Shtetit kanë filluar hetimet për sqarimin e rrethanave të rastit”, ka shtuar zëdhënësi i Policisë.